ആദിവാസി ജനത

ആദിവാസിജനവിഭാഗങ്ങള്ക്ക്  വേണ്ടിയുള്ള വികസനനയങ്ങള്‍  ഇപ്പോഴും തുടങ്ങിയിടത്തു നിന്ന് ഒരടി പോലും മുന്നോട്ട് നീങ്ങിയിട്ടില്ലാ  എന്നത് മനസിലാകണം  എങ്കിൽ വയനാട് മാത്രമല്ലാതെ കേരളത്തിൽ അങ്ങോളമിങ്ങോളമുള്ള മറ്റ് ആദിവാസി മേഖലകള്‍ കൂടി കാണണം. പത്തനംതിട്ടയിലെ പെരുനാട് , ളാഹ പഞ്ചായത്തുകളിലെ വനമേഖലയിൽ ജീവിക്കുന്ന ആദിവാസി കുടുംബങ്ങൾ ഇരുന്നൂറിന് മേൽ വരും. ഇവരെല്ലാവരും തന്നെ കാട്ടിനുള്ളിൽ നിന്ന് വിഭവ ശേഖരണം നടത്തി ജീവിക്കുന്നവരാണ്. വീട്, ശൌചാലയം, വെള്ളം,വെളിച്ചം,പോഷകാഹാരം,വിദ്യാഭ്യാസം, തുടങ്ങി ഒരു മനുഷ്യന്  ജീവിക്കാൻ ആവശ്യമായ ഒരു സൗകര്യങ്ങളും ഇല്ലാതെ മാസംതോറും ഗവണ്മെന്റ് പ്രതിനിധികൾ വഴിപാട് പോലെ കൊണ്ടെത്തിക്കുന്ന അരിയും പയറുപരിപ്പ് വർഗ്ഗങ്ങളും ഭിക്ഷ പോലെ സ്വീകരിച്ചു കാട്ടാനകളുടെയും കാട്ടുപന്നികളുടെയും ആക്രമണങ്ങളിൽ ജീവൻ കൈയിൽ പിടിച്ചു വനമേഖലയിൽ ജീവിച്ചു പോരുന്നവർ.  ആദിവാസികളുടെ വികസനം എന്ന പേരിൽ എണ്ണിയാലൊടുങ്ങാത്ത ഫണ്ടുകൾ നില നിൽക്കുമ്പോഴും ഇവർക്ക് വീട് എന്നത് ഒരു സ്വപ്നം മാത്രം. ഗവണ്മെന്റ് നൽകുന്ന ടാർപോളിൻ ഷീറ്റുകൾ മറച്ചുണ്ടാക്കിഎടുക്കുന്ന താൽക്കാലിക ഷെഡുകൾ കാടിനുള്ളിൽ എത്രത്തോളം പ്രയോജനപ്പെടുന്നുണ്ടാകും എന്ന് ആർക്കും ഊഹിക്കാവുന്നതേ ഉള്ളൂ .കാട്ടിനുള്ളിൽ വിഭവ ശേഖരണത്തിന് പുരുഷന്മാര്‍ പോകുമ്പോൾ സ്ത്രീകളെയും കുട്ടികളെയും ഒറ്റക്കാക്കാൻ കഴിയാത്തതിനാൽ ഉള്ളതെല്ലാം അവിടെ തന്നെ ഉപേക്ഷിച്ചു അവർക്കു മറ്റൊരിടത്തേക്ക് നീങ്ങേണ്ടി വരുന്നു.  "സ്ഥിരമായി ഒരിടത്തു ജീവിക്കാൻ ഇഷ്ടമില്ലാത്തവർ " എന്ന ന്യായത്തിന്മേൽ അധികാരികളുടെ കണ്ണുകൾ അവർക്കു നേരെ തുറക്കുന്നതേയില്ല . തങ്ങൾക്കു വീട് നിർമ്മിച്ച് നൽകും എന്ന ഉറപ്പിന്മേൽ ഇരുന്നൂറോളം കുടുംബൾക്കു വേണ്ടി സ്ഥലം അളന്നിട്ടേക്കുന്നു എന്ന് കേൾക്കാൻ തുടങ്ങിയിട്ട് വർഷങ്ങളായി  എന്നാണിവർ പറയുന്നത്. ഹാരിസണ്‍ മലയാളം പ്ലാന്റെഷന്‍ വളര്‍ന്നു  പടര്‍ന്നു  കിടക്കുന്നതും ഇവിടെ തന്നെ. കൈക്കുഞ്ഞുങ്ങളുമായി,കാടിന് നടുവിൽ മഴയും മഞ്ഞും വെയിലും കൊണ്ട് വന്യ മൃഗങ്ങളുടെ ഏത് നേരത്തുമുള്ള ആക്രമണങ്ങൾ ഭയന്ന് ജീവിക്കേണ്ടി വരുന്ന മനുഷ്യാവസ്ഥ  എത്രത്തോളം ഭീകരമാണെന്ന് , എന്തിനും ഏതിനും പരാതികളുമായി ജീവിക്കുന്ന നമ്മളിൽ ആർക്കും തന്നെ മനസ്സിലാവാത്ത യാഥാർഥ്യമാണ്. മണ്ണും മരവും നശിപ്പിച്ചു വെള്ളവും വായുവും മലിനമാക്കി വികസനമെന്ന നാട്യത്തിൽ പുതുതലമുറക്കിനി ഇടമില്ലാത്ത വിധം പ്രകൃതിയെ ചൂഷണം ചെയ്യുന്ന കുത്തകമുതലാളിമാർക്കില്ലാത്ത നിയമാവലികളാണ് കാടിനെ  ആശ്രയിച്ചു കാടിന്റെക മാറിലുറങ്ങി ഉണരുന്നൊരു ജനവിഭാഗങ്ങൾക്ക് ഭരണകൂടം കൽപ്പിച്ചു നൽകുന്നത്. തലമുറകളായി അനുഭവിച്ചു വരുന്ന ഈ ദുരിതങ്ങൾക്ക്, അവഗണനകൾക്ക്, നഷ്ട്ടപ്പെട്ടുപോകുന്ന ജീവിതത്തിന്  ആര് ,എന്ന് ഇനി മാറ്റം നേടി തരുമെന്നുള്ള അവരുടെ ചോദ്യത്തിന് ആരാണ് മറുപടി നൽകുക.?!!